اورمو گؤلو، سنده خاطيره لريميز وار!

منه تاي باشقا گؤلون يانيندا ياشايان بوتون اينسانلارين اوشاقليق و عؤمور سورمه نين چئشيتلي واختلارينين خاطيره لريندن سوروشساق يقين اورمو گؤلونه چيممك اوچون گئتمك، يوخسا گئديب اوردا گونون باتماسينا باخماق ان شيرين و يادلاردا قالان خاطيره لردن ساييلير، هئچ اونوتمارام اوشاقييديم، يايدا قارداشيملار جمعه گونلري كوچه قاپيميزين آغزيندا اوتورارديق، قونشولارين چوخو يايين ايستيسيندن قاچماق اوچون گؤله گئدرديلر، بيزيم ماشينيميز يوخويدو و بونا گؤره مظلومجا اوتوروب اونلارا باخارديق، ائله سئورديم بيزده گئدك اومور گؤلونه، آمما نه فايدا! كاسيبچيليق بئله دئمكدير و بونو تجروبه ائدن اولماسا منيم نه دئدييمي آنلايا بيلمه يه جك!!

بعضن ماشيني اولان قوهوملار –ماشينلاريندا يئر اولسايدي- بيزيده گؤله آپارارديلار، اورا گئدن زامان دوغروداندا ان خوش چاغلاريميز اولاردي، دئيرديك، گولرديك، شور سويو بير- بيره سه پرديك و سانكي بوتون شنليك لر تكجه بيزيمدير بيله رديك، هئچ بيلمزديك بير گون گلر گؤل بيزدن كوسر!! سوفراسين اؤزويله چكيب آپارار! شنلييي بيزه چوخ گؤرر!

او قورخونج دالغالار، يوخ اولاجاغيني كيمسه دوشونه بيلمزدي، آمما او گونلر گليب چاتيب و بيز گؤلون مظلوميتينه دوروب باخيريق، يالانداندا گلين گئدك آغلاياق، اورمو گؤلون دولدوراق دئييريك!! آخي ندن آغلاياق گلين قوللاريميزي چيرمالاياق، هر يولويلادير بو عزيز گؤلو اؤلومدن قورتاراق، آخي گله جك نسيل لره نه دئيه جه ييك؟؟ باشيميز آلچاق اولماياجاق مي؟ اوره ييميزه قان دولماياجاق مي؟؟

هامي گرك يارديم ائده، من، سن ، او و هامي، ايشچي دن توت مجليسه يوللاديغيميز بوتون نوماينده لر، هامي!!

غيرتيميز وارسا گؤلوموزده اولاجاق!!

يازان: حسين واحدي

گؤنده ر